广州最高逼日式居酒屋，可以望住歌舞伎叹刺身，竟然仲有明星陪食饭？！
2014/11/27 广州笋嘢益街坊
前几日，我同一班朋友去天河六运小区行街，行行下，眼前突现出现一间令我惊艳嘅居酒屋，谂起好多食家都曾经对佢赞不绝口，咁啱未食饭，我同班Friend都忍唔住要入去食番餐劲嘅。
呢间日本市井味十足嘅原誌居酒屋，一入门口就见到成排嘅奖状挂喺墙上，屡获殊荣，难怪会咁受欢迎。
哇!居酒屋竟然都有海鲜超市？!冇错，加工台上面摆满各种新鲜肥美嘅海鲜，我哋一眼就可以睇到当日有咩新鲜食材。服务员话，欢迎我哋随便过去睇下想食乜。
见到D海鲜咁大只咁诱人，点忍到口啊，首先点几样嚟食下，想食边样、食几多都係由自己话事!
我散点咗4样，结果师傅就帮我砌出咁华丽嘅拼盘，有冻海螺、三文鱼、北极贝以及优选鹅肝。
冻海螺好大粒，食落口超!级!爽口鲜甜!北极贝更加係刺身中嘅极品!入口唔单止鲜嫩清爽，仲有海鲜特有嘅甜味，口感根本唔係以往所见北极贝嘅生硬略韧，甚至仲有脆滑感!而呢度嘅鹅肝，外表同朱古力无差，但係比朱古力更加香醇，入口即化，超级绵软，就好似同鹅肝kiss嘅感觉。
作为一个合格嘅肉食动物，斋散点边度够喉啊，梗係要叫多个三文鱼刺身啦。
三文鱼嘅纹路好清晰!一睇就知道係靓货，而且师傅刀工唔错，厚切得嚟又冇破坏三文鱼嘅肉质，一块三文鱼就有我一只大拇指咁粗!太粗暴啦，我钟意!
一生人难得豪一次。我同小伙伴们一眼就相中呢只重达4斤嘅皇帝蟹，原誌嘅做法係原!只!烤!
卖相够晒霸气，名号都好把炮——海胆酱烧皇帝蟹!海胆酱，我都係第一次食。
呢个皇帝蟹，有4斤咁重，真係好大一只。烤之前，师傅就已经帮我哋将蟹身分开，再淋上酱汁，最尾先入焗炉烤。
烤到金黄色嘅蟹肉，一上台，唔使讲嘢，小伙伴们已经不约而同噉将魔爪伸向皇帝蟹，一瞬间就瓜分完毕，好一个风卷残云。蟹肉超级鲜甜，食落口啖啖肉，唔单止冇流失蟹肉本身嘅水分同鲜味，再加上海胆酱馥郁嘅咸鲜味，真係mix得无与伦比!
跟住上嘅呢个鲜虾佐酪寿司卷，竟然係极少见嘅热食寿司。去咗壳嘅原只虾肉铺喺寿司面头，再淋上香味扑鼻嘅独家秘制奶酪酱，照烧汁打底，闻到阵味我味蕾已经蠢蠢欲动。
同样係热食嘅炙烧干贝柱茄肉寿司，就係另一种味道。大大粒干贝摆喺上面，清晰可见，而闻到嘅，係酸甜浓郁嘅意式茄肉酱。一啖食落去，茄酱嘅酸甜中隐约散发干贝嘅鲜味，暖笠笠，零舍滋味。
三文鱼除咗做刺身好食，用嚟焗饭都一样咁正。辣辣三文鱼焗饭，用锡碗装住嚟焗，可以锁住食材嘅汁水，防止味道流失。
值得一提嘅係，呢个焗饭嘅米唔係普通大米，而係寿司米，米饭伴有蛋白，食起身特别香，特别有营养。焗熟嘅三文鱼，好嫩滑，又冇走失鲜味。加埋表面淋嘅泰式辣酱，为成个饭增加咗一种独特嘅风味，perfect。
具有日本风味嘅高筋朴叶烧牛肉，用最原始嘅方法——炭烧嚟烧熟牛肉，特别嘅係，牛肉嘅下面，隔住一片朴叶。
原来呢个就係日本特有嘅烹制方式——朴叶烧，朴叶经过烧灼，能够散发出独特嘅香气，并且突出料理嘅鲜美。而经过朴叶嘅渗透，牛肉入口唔止有劲道，仲有浓郁嘅朴叶清香添。
同样係牛肉，呢个澳洲炭烧牛肩扒就比较“厚道”啦。原誌嘅呢个牛肩扒，切得比一般嘅扒要更加厚。切开之后，牛肉呈现新鲜嘅粉红色，食起身咸香可口，肉汁饱满，虽然吸收晒调味嘅酱汁，但係仲可以食到一阵牛肉味，爽!
嚟到日料店，又点可以少得拉面。原誌新推出嘅地狱拉面，颜色就真係几似地狱炼火，好似几正，一于点个嚟试试。
鸡蛋、鲜笋、叉烧、鱼板……呢碗拉面材料认真丰富，汤底入口先係浓浓嘅醇香，然后先至係辣意。而魔鬼椒嘅出现，令辣味瞬间冲刺到极点!寒冷嘅冬天，整番碗热辣辣嘅拉面，噉先叫过瘾。
去到日本都会食嘅串烧合盛拼，原誌都有。
串烧合盛因为美味而且营养价值高，一直都深受日本人嘅青睐，而原誌嘅串烧合盛拼，有成4串咁多，元贝、杏鲍菇、培根、虾，呢个组合堪称本年度最有诚意嘅串烧合盛啦。
同样係炭烧嘅煮法，将食材嘅味道原汁原味逼出嚟，比起其他烹制方法，更具有地道嘅日本风味。
咦，隔离台咁香嘅係乜嘢？问咗服务员，先知道係山椒豚骨烧。见佢哋食得几香噉，我都点个试下。
土山椒，又叫孜然，用佢嚟烤黑毛猪骨，香味真係可以用一个“绝”字嚟形容。猪骨肉质好烟韧，酱汁同孜然嘅香味渗晒入肉里面，加上柠檬嘅酸酸甜甜，呢个料理，喺广州绝无仅有!
食得差唔多，不如去参观下环境。原誌嘅环境好有日本风，一灯一画，都透露出浓厚嘅日本风情。
内部装修布置，温暖实在，摆设都係从日本入货返嚟嘅特色文化物品，摆满成间居酒屋，令食客彷如置身日本当地嘅居酒屋一样。
店内都摆有好多酒，钟意饮日本酒嘅人嚟呢度冇错。
日本歌舞伎艺公仔，一姿一态都别具韵味。
墙上贴满好多食客嘅照片，如果你认真仔细睇睇，唔难发现其中就有几个你喺电视上见到过嘅明星。
小编总结
温暖实在嘅环境，味道可口嘅料理，原誌居酒屋，唔需要太多华丽嘅修饰，啱晒落班之后，或者空闲时候，同朋友结伴同行，饮几杯酒，食几碟串烧，把酒当歌，畅谈人生，呢个，先係真正嘅“心灵港湾”。
原誌居酒屋
地址：广州天河南一路106号101房(正佳南门对面7-11往里走50米)
电话：020-85167683、18027314423
营业时间：中午11:30——14:30、晚上17:00——24:00
http://www.duyihua.cn
返回 广州笋嘢益街坊 返回首页 返回百拇医药