江南西一家喝完奶茶，杯子可以带走的餐吧！
2014/12/16 广州笋嘢益街坊

    

     小师妹(私人微信：miss5flower)觉得，每一个女仔应该都有那么一张相，係捧住一杯热茶或者係饮品嚟影嘅，呢个可能就係所谓嘅“杯子情结”。我相信每个人对于杯，都係情有独钟嘅。无论食咗饭未，做紧乜嘢，只要我想唞一唞，首先谂到嘅，都係坐低饮杯奶茶。呢个，可能就係我嘅奶茶梦。江南西有间餐厅，铺头每只杯都係独一无二，客人饮完嘢可以带走只杯，喺杯里面种魔豆，令佢唔再只係一杯饮品咁简单。

     由朝忙到晏，谂谂下先知，已经好耐冇好好享受过属于自己嘅休闲时光。广州嘅冬天，幸好仲可以见到太阳，晒到成个人暖笠笠，真係好想伸个懒腰，揾个静静地嘅地方，hea一hea。

    

     忙里偷闲，决定畀自己放下假。从工作堆中逃出嚟，不知不觉，行到江南西路，记得呢度有一间休闲西餐厅，有露天餐位，最适合晒太阳。

    

    

     见到餐厅挂满圣诞装饰，我至忽然谂起，圣诞节又係时候到啦，呢个神圣嘅西方传统节日，大家谂到要同边个一齐过未？

    

     餐厅里面有好多趣致嘅玩意，比如CS公仔、英伦士兵玩偶、西方油画，以及呢个复古味道十足嘅缝纫机，令我谂起十几年前，嫲嫲亲手帮我缝补校服嘅背影。

    

     揭开餐牌，先知道原嚟呢度唔止布置好讲究，连饮品嘅设计都好有心机。其中我最喜爱嘅，莫过于盆栽奶茶，足以满足任何一个女仔对于奶茶嘅幻想。

    

     流星雨

     呢度嘅杯，比起其他餐厅嘅杯，都要特别。无论係杯嘅颜色，抑或係杯嘅图案花纹，都可以话，係独一无二嘅。

     七彩陨石

     就算係颜色相同嘅两只杯，仔细D睇，都可以睇出唔同。因为喺烧制过程里面，保证唔到每一滴色釉都係固定嘅，所以就造就咗每一只独一无二嘅杯诞生，就好似人类嘅DNA一样，感觉好奇妙。

     落英缤纷

     食一粒面头嘅棉花糖，感受柔软绵滑嘅口感，丝丝香甜，甜到入心。再用咖啡匙将奶茶同奥利奥碎搅匀，奶茶特有嘅香味即刻氤氲而生。忍唔住饮一啖先，奶香中透出红茶嘅清香，茶香里面又夹杂奶嘅香甜——叫我如何不爱。

     宇宙红豆记得梁静茹有一首歌叫《情歌》，里面有句歌词“一整个宇宙换一颗红豆”，红豆係爱情嘅象征，用全宇宙去换取人世间最美好嘅爱情，简直係最浪漫嘅事。

    

     甜蜜蜜嘅红豆，除咗同抹茶match之外，原嚟同奶茶都一样绝配。寄思念于红豆之中，如果有一个人，请你饮红豆奶茶，你一定要记得，红豆背后浪漫嘅含义——愿君多采撷，此物最相思。

    

     希望树传统嘅盆栽奶茶，冇太多花巧嘅装修，但係却令我深深感受到乜嘢係生命力、乜嘢係希冀。

    

     佢就好似係地球上嘅一棵小草，即使周围环境恶劣，但係亦努力茁壮成长，唔放弃自己，呢种充满生机嘅朝气深深打动我，霎时不禁觉得，做人更要努力向上!

     奇幻魔豆

     饮完奶茶，服务员同我讲，只杯可以带走，因为店主希望客人可以记得呢只属于自己嘅独一无二嘅杯，记得喺呢度，曾经度过一个休闲惬意嘅时光。

    

     随杯赠送嘅，仲有各种印有唔同祝福嘅魔豆，客人可以将魔豆种喺杯里面，等待发芽成长，又係一个新生命。

     “考试第一”“GOOD LUCK”“每一天开心”……咁多愿望我都想要!不过惊种得太多会影响魔豆发芽，所以都係唔好太贪心，攞一粒就够，我要拣一个最特别嘅愿望。

    

     唔知魔豆几时先会发芽成长，有D期待。到时候，我嘅愿望都会实现啦啩。如果梦想成真，我真係要多谢呢一粒魔豆，佢可能真係被施加过魔法。嘻嘻~

     小编总结

     每一杯盆栽奶茶，背后都有自己嘅故事，值得每个人用心好好去品尝。店主好花心思噉四处淘到呢D独一无二嘅杯，搭配色彩斑斓嘅装饰，创造出光彩夺目嘅盆栽奶茶，茶香奶浓，寒冷嘅冬天，杯上冒出缕缕热气，带畀你贴心嘅温暖。

     窝居

     人均：18元

     地址：海珠区江南西路青竹大街5号102号铺(近江南新村第一小学青凤校区)

     电话：020-34277540、13711627742

     营业时间：11:00——24:30

    

    

    

    http://www.duyihua.cn
返回 广州笋嘢益街坊 返回首页 返回百拇医药