白云有间超巨型海鲜城，创新健康食法，批发价叹尽环球海鲜！食饭仲免费包房唱K！
2015/2/4 广州笋嘢益街坊
前几日，小师妹同班friend出阜玩，返去经过新广从路嘅时候，有D肚饿，但係眼见周围都山卡拉噉，谂住会饿住返去噶啦，点知喺太和镇附近，见到一间装修超靓嘅海鲜城，简直就係海市蜃楼!
呢一间好日子环球海鲜城，足足有成5层咁高!海鲜城外仲有大型停车场免费提供。估唔到太和都有咁土豪嘅酒楼，斋係环境都靓过市区D酒楼多多声啦。
环球海鲜城，顾名思义，就係世界各地嘅海鲜都有得食，而且价钱都係批发价!斋係佢哋嘅海鲜池，就霸占咗1楼咁大面积，噉先係真真正正嘅海鲜城嘛，霸气到爆炸!
而好日子嘅特色海鲜食法，就係蒸汽锅啦，唔好睇小佢哋嘅蒸汽锅啵，连我呢个号称食遍广州无敌手嘅食货，都被好日子刷新咗我对桑拿火锅嘅认识!
佢哋嘅蒸汽火锅唔係其它餐厅嗰D普通嘅铜锅，而係用瓦制锅嚟做器皿，蒸汽呢，就係用几千蚊一台定做嘅蒸汽发生器。一打开气阀，即刻就有蒸汽出嚟，等都唔使等!
蒸汽火锅，原汁原味又唔热气，最大程度留住食物嘅鲜味。我哋喺楼下拣咗几样海鲜，价钱同黄沙水产市场持平，都好抵食。
与众不同嘅仲有锅底!咪以为蒸汽火锅就冇锅底可言，好日子嘅锅底，一样可以食得招积。呢个排骨米锅底，经过蒸汽加热可以慢慢焖成粥咖!首先试下D九节虾先。
我平时食蒸汽火锅嘅餐厅都係用闹钟嚟计时，一到时间就响唔停，人多D都唔知係边个闹钟响紧。不过好日子就创新用沙漏计时，唔同海鲜有唔同计时面，好人性化。
谂住去攞只虾放入火锅上面，点知佢突然弹咗下，鬼死咁生猛。九节虾係我最钟意食嘅虾，肉质清爽又有韧性，弹性十足，口感好正，就算唔蘸酱油都好好食。
跟住倒D丝瓜同白贝落去。
蒸汽发生器就係唔同，温度可以瞬间上升到120度，“嘘”一声就食得啦。
再试下呢度特有嘅本地蚌仔，每一只都好肥美，足足有10+cm咁长!只係58蚊1斤咋!
第一次食呢个本地蚌仔，绝对够惊喜!肉质出乎意料地爽脆，咬起身“卡兹卡兹”声，好过瘾!
最尾食嘅係花蟹，无悬念噉都係大只过人。
揭开盖，就闻到好鲜嘅蟹味，花蟹颜色鲜艳夺目，蟹黄肥美丰腴，肉质清甜鲜嫩，一啖咬落去，仲食到海鲜嘅汁水，好滋味!
食到差唔多，锅底都“米已成炊”啦。听师傅介绍，呢个米係先泡足6粒钟，唔加油盐，喺蒸熟嘅同时边吸收海鲜滴落嚟嘅汁水，特别清甜。
食完之后，我对蒸汽火锅嘅印象又上升到一个全新嘅高度，高温高效出嚟嘅原汁原味，先至係真正嘅蒸汽火锅!至于呢度嘅粤菜，都几得噶。
干逼啤酒鹅风味诱人个人就好钟意呢道干逼鹅，味道好正，唔加水，直接逼出鹅肉嘅油水出嚟，味道更加滋味。
虽然係冇加水，不过鹅肉一D都唔干身，食起身汁水都几丰富，而且肉质好爽好韧，浓郁嘅酱香味盈满于味蕾上。
新派点心
好日子除咗食海鲜够平靓正，呢度嘅点心都食得过噶，全部即点即做，出品大件又精致，同其他著名点心餐厅有得比。
虾饺皇
半透明嘅薄皮，隐隐约约可以睇得出里面鲜红嘅虾仁，而且浸浴喺高汤之中，呢粒虾饺，精致动人。
咬入口嘅时候，虾饺仲係暖笠笠嘅，虾仁好爽，肉同鲜笋嘅味好清甜，仲有香醇嘅汤汁，呢D先係极品点心。
金丝燕麦包
金丝燕麦包係好日子嘅招牌点心，随便喺大众点评上面搜一搜都见到网友嘅推荐。
燕麦包好柔软，里面嘅燕麦浆竟然係暖嘅，而且香浓顺滑，唔係其它酒楼嗰D好dry嘅馅，入口丝丝暖意包围住，甜而唔腻，好想再嚟多只。
韭菜煎饺
香、爽、外脆内软。
芝士焗番薯
估唔到酒楼都食到呢个人气点心小食，口感超级软糯，闻起身就好香。
黐黐绵绵嘅感觉，好香甜，食到中间，忽然有D咸味，原嚟係面头嘅芝士，香甜中带咸，有一种奇妙嘅感觉。
金奖雪榴莲
好似日本嘅雪梅娘，出面一层超薄嘅饼皮好粉嫩，一啖咬落去，细腻丰腴嘅榴莲慕斯闯入口中，香甜顺滑，唔食榴莲嘅我都爱上咗佢。
拿破仑薄饼
外皮超级酥脆!食起身仲脆过食薯片!里面嘅肉碎经过腌制，好香。
豉油皇浸鸡脚
经过豉油洗礼嘅鸡脚，香浓咸香。
怀旧咸煎饼
睇起身好似好普通，其实佢一D都唔普通。口感好酥脆，里面有香葱，香到无朋友!
好日子3楼包房设有豪华卡拉OK以及棋牌，用餐时段免费提供。音响设备好先进!最紧要嘅係，包房唱K完全唔使最低消费!先到先得!
食饱饱，走嘅时候见到楼下嘅海鲜池仲有唔少人喺度拣海鲜，走过去睇下，原嚟好日子呢度仲可以买海鲜返屋企自己煮，因为价钱同水产市场基本持平，平过喺街市买，好多街坊都专登过嚟买海鲜。
好日子环球海鲜城
人均：50元
地址：白云区太和镇永兴村(新广从路105国道天龙花园)
电话：020-61992116、020-61992115
营业时间：早茶：07：30-14：00；午市：11：00-14：30；晚市：17：30-21：30；宵夜：21：00-02：00(节假日营业时间延长半小时)
公交路线指引：公交车乘坐至永兴村口站，下车后过马路向北行50米左右。
行车路线(导航：天龙花园或好日子环球海鲜城)
1、高速公路北二环太和石湖出口，往广州方向走1公里；
2、广州往从化方向，快到北二环掉头1公里。
http://www.duyihua.cn
返回 广州笋嘢益街坊 返回首页 返回百拇医药